Wani bincike da jaridar PRNigeria ta gudanar ya bayyana cewa akalla mutane dubu 10 ne suka rasa mutsugunnan su tsahon shekaru 3 da suka gabata, a jihar Kebbi dake Arewacin Nijeriya.
Kalli Video:
Mutanen sun rasa matsugunnin ne sakamakon wasu hare-hare da ‘Yan bindiga suka kaddamar a tsakanin kauyukan Chonoko da wasu yankuna a karamar hukumar Danko/Wasagu ta Jihar.
Jaridar tace wani kisan kiyashi da ‘Yan bindigar suka fara kan Al’ummomin sun halaka mutum 200 tare da fatattakar kauyuka 42 a shekarar 2019.
Kauyukan sun hadar da Dan Kade, Warkata, Kurgiye, Ragam I, II da ta III, ‘Yar Kuka, Shangel, Tungan Dangula, Kahalmo I da ta II, Kadebo, Ched-Kubu, Yababa, Gimi, Ganyale I, II da ta III, Silabi da kuma Digoga.
Sai kuma wasu kauyukan da suka hadar da; Bankunatare, Bawada, Zagami, Turame, Gyado, Tungan Kwando, Ketare, Sebzama I, II da ta III, Dhilo da kuma Duru.
Sauran sun hadar da; Tudun Wada, Digwengwe, Gaya, Saaki, ‘Yar Buga, Dilanko, Zuttu da Irgaa.
Wakilan jarida su biyu (2) da suka ziyarci garin na Chonoko, sun rawaito cewa tun daga lokacin ‘yan bindigar suka mamaye gidajen wadanda suka mutu ba tare da wani daukar mataki kan hakan ba.
A yayin da yake bayyanawa PRNigeria irin halin da ya shiga, wani tsoho mai kimanin shekaru 70 mai suna Mai Unguwa Maizuwa da aka kora daga kauyen Zagami ya bayyana cewa ‘yan bindigar sun shafe shekaru 3 a jere suna kai hare-hare a kan al’ummar tun daga shekarar 2019.
Yace “’yan bindigar bayan sun kore shanun su sun kuma yi awon gaba da dukiyoyinsu, baya ga hallaka mutane da dama, sannan kuma a ‘yan tsakanin nan sun kori kowa daga kauyen.
Mai zuwa yace “bayan haka yayi asarar wasu kayayyaki da suka hadar da buhunan siminti da dama da kuma wasu kudade da ya ajiye na kasuwanci, kimanin naira 997,000 a yayin harin
Read Also:
Mai zuwa dake da ‘ya’ya guda Shirin (20) yanzu haka yana rayuwa ne a sansanin ‘yan gudun hijra mai tarin cunkoso dake garin Chonoko.
Wani magidanci daya rasa Dan sa sakamakon wasu hare-haren ‘Yan bindiga a kauyen Kadebo, Musa Sarkin Makada, ya bayyana wa PRNigeria yadda suka shiga halin kakanakayi tun bayan da akayi awon gaba da Al’ummomin su.
An ruwaito cewa tun da aka kai hare-haren kauyen ya zama tamkar kufai, baya ga kwashe mata da kananan yara da tsoffi gami da nakasassu wadanda baza su iya guduwa ba domin tsira da rayuka su.
Shima da yake Magana a irin wannan yanayi na alhini, guda cikin shugaban al’ummar duk da ya nemi a sakaye sunan sa, ya bayyanawa PRNigeria cewa kawo yanzu ‘yan ta’addan na cigaba da cin karen su babu babbaka ba tare da an hukunta su ba; inda suka kori wasu mutane da kauyukan su tare da kone gidaje da kayayyakin abinci inda makarantu suka kasance a rufe.
“Baya ga hare-hare da garkuwa da mutanen kauyen, ‘yan bindigar na lalata gonaki da gidajen al’ummomin yankin da basu da karfi.
“Matsalar abinci da ake fuskanta babu shakka zata lakume rayukan mutane da dama, saboda an tilastawa dubban manoma hakura da gonakin su, kuma hakan ya rage ayyukan noman da ke matsayin hanya daya tilo ga mazauna yankin. Haka kuma an rufe makarantu a dukkan kayukan da al’amarin ya shafa, kaga wannan na taimakawa wajen kara yawan daliban da basu samin damar karatun.
“Bugu da kari, duk wannan ta’asa da ‘yan ta’addan ke aikatawa, babu wasu jami’an tsaro dake kokarin daukar mataki domin magance ayyukan su, yayin da hukumomin agaji da suka hadar da Red Cross da hukumar bada agajin gaggawa ta NEMA basu bayar da wani tallafi ga ‘Yan gudun hijirar musamman kayayyakin agaji da magunguna ga marasa lafiya da masu rauni.
“Yanzu haka dai mutanen da suka rasa matsugunansu basu da Muradin komawa gidajen sakamakon mummunan yanayin da suka fuskanta,” kamar yadda ya bayyana cikin tashin hankali.
A martanin da hukumar bada agajin gaggawa ta NEMA tayi kan wannan rahoto hukumar tayi alkawarin magance matsalolin da ‘yan gudun hijirar ke ciki da gaggawa, yayin da ICRC tace, sakamakon ayyukan jin kai da suke yi a yankin Arewa Maso Gabas da kuma Arewa ta Tsakiya, kawo yanzu da basu sami damar mayar da hankali kan Arewa Maso Yammacin Nijeriya ba.
By PRNigeria Hausa
