Najeriya da China sun cimma yarjejeniyar Yuro biliyan 7 a bangaren makamashi

Najeriya da China sun rattaba hannu akan yarjejeniyar samar da makamashi mara gurɓata muhalli da ya kai Yuro biliyan 7 da miliyan ɗari 6 da zummar sauyawa daga amfani da makamashi mai gurɓata muhalli daidai da yadda dokokin duniya suka tanada.

A ƙarshen makon da ya gabata ne aka tabbatar da wannan yarjejeniya a hukumance a Uyo, babban birnin jihar Akwa Ibom a  tsakanin gwamnatin Najeriya da kamfanin  APPL Hydrogen Limited (AHL), da LONGi Green Energy Technology Company Limited  na ƙasar China.

Za a gudanar da wannan aiki ne yankin da aka sakar wa yan kasuwa mara su gudanar da sabgoginsu, wato Liberty Free Trade Zone da ke garin Atabrikang a ƙaraamar hukumar  Ibeno ta jihar Akwa Ibom.

Kamfanin LONGi, wanda ke kan gaba a hakar sauyawa zuwa amfani da makamashi mara gurɓata muhalli a duniya, da AHL na Najeriya, wanda ya ƙware wajen samar da makamashi da ba ya illata muhalli ne za su yi haɗaka don tafiyar da aikin, kamar yadda yake a cikin yarjejeniyar fahimtar juna da aka yi.

Da yake jawabi a yayin rattaba  hannu a yarjejeniyar, ministan kimiyya da fasaha na Najeriya, Uche Nnaji ya jaddada mahimmancin shirin a koƙarin da Najeriya ke yi wajen sauyawa zuwa amgfani da makamashin da ba ya illa ga muhalli.