Sojojin Nijeriya Sun kama masu Safarar Man fetur ga ISWAP a jihar Borno

Dakarun rundunar sojojin Najeriya ta Birged na 29 wadanda aka fi sani da Operation Hadin kai sun sanar cewa sun kama wasu mutum 13 masu sayar wa mayakan ISWAP kayayyakin da suke amfani da su a hare-haren da suke kai wa al’umomi a Jihar Borno.

Rahotanni daga yankin tafkin Chadi na cewa an kama mutanen ne ranar talata yayin wani samame da dakarun Najeriya da na Civilian JTF suka kai kasuwar Benishek a karamar hukumar Kaga.

Rahoton ya kuma ce an kama su ne yayin da suka kokarin fitar da man fetur mai yawa da abinci zuwa wurin da mayakan ISWAP suke.

Ga abin da wani ke cewa: “A duk ranar kasuwa, ‘yan kasuwa da ke wa mayakan ISWAP aiki kan tafi kasuwanni dmin sayo musu kayayyakin abinci da man fetur da layukan salula da kayan sanyawa da sauran kayayyain da suke bukata.”